陳亞蘭主演「勇氣家族」 看見戲班人生、世代衝突

台頂演員陳亞蘭和莊凱勛，分別扮演樊梨花佮薛丁山拍對手戲，翁生某旦，目尾牽電線。怹兩位佇新戲「勇氣家族」內底演歌仔戲班家族的夫妻，戲主要是咧講戲班成員台頂台跤的人生故事，和家族之間世代的衝突。

電視劇「勇氣家族」，「劇場的做法無一定適合咱歌仔戲，阮學校有教，講愛予觀眾佮顧客有體驗，你欲做這款的安排，愛先共觀眾托頭，予ﰀ有心理準備。」

主演陳亞蘭表示這齣戲，會使講是伊的人生縮影，其中「勇氣家族」內底，歌仔戲面臨現代創新和傳統的衝突，也是目前濟濟戲班世代交接的狀況，伊也堅持兩項攏愛兼顧，所以這齣戲嘛加入濟濟動畫美術。抑若新世代演員林雨宣是表示，家己因為演這齣戲，佇歌仔戲的跤步手路下真濟苦工，才真正體會著歌仔戲演員的辛苦。

演員陳亞蘭提到，「傳統兼創新，是這馬現代戲劇應該愛表現的，對歌仔戲來講，阮更加注意這一點，因為歌仔戲是傳統戲曲，我無愛予人有這種印象，所以我一定創新的元素，會囥佇咧內底囥真濟，但是若無適合的我絕對袂硬加。」

演員林雨宣說明，「因為文化傳承這件代誌，本身就無簡單，然後阮閣較按怎拚性命做，干焦會當做到表面，所以我真正非常佩服，就是用規个性命咧做文化傳承的代誌。」

「勇氣家族」講的是歌仔戲班的故事，製作人葉天倫表示，事實上ﰀ攏有共歌仔戲每一齣經典，自頭至尾翕落來，才來共精華鉸入去電視劇內底，希望予觀眾看著歌仔戲的媠。

製作人葉天倫表示，「遮經典的物件我是感覺講，若是這馬干焦會當佇咧廟的看著，是真可惜，這改會當佇咧公視台語台，會當佇咧華視，會當佇咧中華電信，會當佇咧LINE TV，遮爾仔濟人會當看著，當然要共上經典的戲攏總呈現出來。」

這齣「勇氣家族」這禮拜日暗時，會開始放送，製作人希望觀眾會當做伙來看台灣文化的驕傲，了解歌仔戲的底蒂、和戲台跤的鹹酸苦澀。