台語詩改編做舞蹈 「走跳人生」探討性命意義

改編自作家陳明仁的台語詩「哭kap笑-性命記事」，共文學改做舞蹈創作「走跳人生」，導演蔡晴丞表示家己初初咧讀台語文學的時，對文學誠生份，毋過當伊聽著陳明仁有聲冊的台語配音，伊的感情佮情緒隨飽滇起來，嘛因為台語的音樂性予伊咧編舞的時有豐富的靈感。

「走跳人生」用舞蹈來走揣每一个人的人生角色，和對生活的體會。表演者認為透過舞蹈，會當予愈濟人了解台語文學的多樣性。這齣舞作會佇臺灣文學基地主辦的文學改編舞蹈計畫當中演出，舞者希望未來嘛會當用愈濟方式，和逐家來認捌臺灣文學。

主辦方表示，這改「走跳人生」的表演，會佇4/20、4/21臺北的臺灣文學基地正式演出。另外，為著推廣母語，逐個月佇遮，嘛攏有台語繪本講故事的親子活動，希望大人囡仔攏通對無仝活動，來揣著家己和文學、佮母語的連結。