舊曆12/24送神兼筅黗 掌握鋩角保氣運、過好年

拜六就是舊曆12月24，佇咧臺灣民俗內底，這是送神明轉天庭奏職、歇過年的日子，家家戶戶也會佇這工筅黗，民俗專家溫宗翰表示筅黗除了厝內大摒掃，神明廳的部份，嘛會共香爐、神尊、神明漆仔等等，用筅仔、桌布共坱埃、香煙摒予清氣。毋過，專家提醒講，咧清香爐的時毋通共振動著，香烌若傷滇會使用湯匙共ﱧ出來。

臺灣民俗專家溫宗翰，「清這个香爐的時陣，咱會先共內底的香枝抽出來，抽出來了後，咱才閣共內底的香烌共伊揤揤咧，揤予算做共踅予按呢圓圓，你嘛袂使共揤傷落去，因為咱佇咧香爐的觀念，咱插香插會鬆、趁錢較輕鬆，所以咱佇咧香爐內底的香烌，上好是鬆鬆按呢。」

另外，筅黗這兩字是欲按怎寫咧?一般中文會借臺語音，寫做「清屯」、抑是「清塵」，毋過，若照教育部臺文的推薦用字，「筅黗」應該寫做竹字頭的筅、黑字爿的黗，咱來聽臺語老師按怎解說。

臺語老師林綉華，「這字筅就是有清潔的意思、清除的意思，譬論講咱講雞毛筅，用雞毛筅共坱埃筅掉，黗嘛有就是包括坱埃、薰油，像講尪架桌頂懸咱有排香爐有香烌，的咱攏會當叫做黗。」

咱的臺灣俗語內底閣有一句「大摒厝，較會富」，通常佇咧24送神以後，就會開始大摒掃，民俗專家表示，佇咧臺灣民俗內底一般會對厝外摒入來厝內，代表講共外口的錢財、氣運攏掃進厝內底，這嘛是濟濟民眾對新年的向望。