講著立冬，烏魚正著時，彰化伸港今年頭一批飼的烏魚已經咧收，毋過受著今年暖冬的影響，烏魚有較細尾，烏魚子嘛較細枇，平均一斤落兩百箍左右。（這條新聞標題、導言、內文是臺語文。）
現掠的烏魚一下上岸，漁民無閒咧刣魚，取烏魚子，這是彰化伸港頭一批人工飼的烏魚，知門路的民眾，一透早就佇現場等欲買魚。
民眾：「這季節的烏魚殼較好食，若講，敢若無著時的話，肉質就會較無好食。」
民眾：「阮嘛是算討海人，對這魚仔講究新鮮。你若活活刣刣的現煮，肉加足好食的，這算內行的咧食的。」
漁民表示，烏魚是寒帶魚，愛寒、魚仔才會大，最近這幾冬因為氣候暖化，烏魚是愈來愈歹飼，愈飼愈細尾。
漁民：「差不多閣三四冬，就無魚仔通賣矣。因為按怎講，因為攏放袂起來，放的死亡率攏足濟的，閣烏魚子價數賣袂好，煞落去的時，你像今年暖冬，這規冬來攏欲殺，（烏魚子)八兩七兩以上，會使講足少的，這馬咧刣攏三四兩。」
漁民講，烏魚栽愛放三年才有法度收成，今年收大約五千尾，但因為天氣熱，烏魚較細隻，烏魚子嘛較細枇，烏魚殼一台斤六十五箍，烏魚子每台斤千一，價格攏有比舊年較俗。