今年64歲的美珠姐仔跤手扭掠，一个人佇灶跤無閒煮食，這頓毋是煮予家己爾，是煮欲30人份、佮社區共餐的序大鬥陣食。
社區共餐據點廚子師李美珠表示：「每一个人攏會老，咱若食到7、80歲，飯有人煮予咱食，按呢嘛是蓋幸福。」
美珠姐仔講，伊雖然退休矣，但是用「少年序大服務高齡序大」的精神，猶是來服務逐家。台灣高齡化速度真緊，估計2025年就會成做老人人口20%以上的超高齡社會，速度強欲是世界上緊。日本共老人人口超過50%的所在號做「極限村落」，台灣總人口來看、可能2070年就會達到43%。
台大社會系退休教授薛承泰表示：「因為你活了久，老人數量會愈來愈濟，但是你生了少，會予老人的比例增加了閣較緊，咱佇1950年代，(一个婦女)會生7个囡仔，最近生無到1个。」
人口老化的方向無法度翻頭，照護需求綴咧增加。政府提出長照政策，2016年經費倚50億、舊年超過600億，抑若現此時，嘛有超過22萬的外籍移工，投入國內看護工課。長期關心老人福利的立委吳玉琴認為，世界攏咧欠工，台灣傷過依賴外籍移工，也是問題。
立法委員吳玉琴表示：「這馬攏是搶人大作戰，毋但臺灣欠工，日本照顧人力也是欠工真嚴重，好的勞動條件佮好的臺灣環境，應該會是吸引in留落來的動力。」
社區共餐據點廚子師李美珠表示：「本來我嘛是想講舊年欲退休有無，但是就是感覺講，猶閣好跤好手，會振會動，為啥物無愛做一寡工課。」
台灣面對高齡化，除了關心長照的議題。這馬醫療進步、序大也通閣一擺投入社會服務，現代人對退休到老去，平均閣會當食2、30年，現此時，社會上嘛開始有團體有意識咧呼籲政府，老人的政策、袂使只有長照。
壯世代教科文協會理事長吳春城表示：「臺灣這馬欲退休有500萬人，因為政府嘛無政策，就是長照，所有產品攏欲品牌少年化，無人咧做高齡品牌。」
立法委員吳玉琴表示：「刻板印象攏認為退休了後，就是養老，然後四界耍，退休了後，第三人生按怎成做有路用，成做通對社會再貢獻的人。」
台灣戰後教育開始普及、經濟也快速發展，真濟這沿的人，雖罔漸漸有歲矣，毋過猶是身體健康、而且有豐富的資產，對社會猶是會當有真大的貢獻。若是通透過政府的政策，予序大閣一擺發揮，漸漸高齡化的台灣、就會使有新的可能。