湯德章舊厝90年、損害嚴重 協會募款欲修復
李晨宇 / 臺南報導
發布時間：
更新時間：
湯德章紀念館佇兩年前，由公民的力量做伙集資共買落來。毋過，這棟九十年的老厝已經年久失修，內底會漏水，閣加上這間厝無拍地基，損害真嚴重。為著欲保存文化資產，協會發起修復計畫，但是需要真濟經費，拍算欲對外募款。(本則新聞標題、導言、內文皆為臺文)
規塗跤攏是建築的廢棄物，遮是兩冬前成立的湯德章故居紀念館，這兩冬來遮辦過真濟活動，毋過這棟90偌年的老厝，除了會漏水，厝閣無地基，規个敧一爿，就按呢協會閣一擺發起募捐的計畫，欲趕緊來整修。
民眾 徐小姐：「臺南市是一个古都，會使歡迎外地的人遮參觀。」
湯德章紀念館理事長 黃建龍：「第一个部份就是還原伊事務原來日本時代的原樣，盡量予伊恢復；第二个部分就是將會重新設計展示的功能。」
湯德章律師是228事件的受難者，伊的故居是靠民間募資才搶救落來，目前暫停開放，協會已經完成地質改良，in共拆落來木材攏撿起來，閣做編號，目的就是恢復遮原底的模樣。欲共歷史遺產保存下來，愛開真濟錢，目前政府已經補助七成，毋過賰的協會愛閣傱百幾萬。
湯德章紀念館理事長 黃建龍：「未來的改造伊嘛是一座人民的博物館，所以我嘛希望(資金)加加起來，將近欲千捅萬的費用，會當透過閣一改來的群眾來鬥相共。」
湯德章紀念館理事長表示，改造了後，拍算欲共原底毋敢囥入來的文物展示出來，佮規劃特展佮講座。另外，嘛規劃欲閣一擺送文資處審議，望遮成做是紀念建築。
買湘瑩/編輯
