厝跤共用電表定超過700度 4月恐驚愛起電錢
郭柏均 謝季潾 / 台北報導
發布時間：
更新時間：
目次
4/1開始，電欲起價。民生用電一個月用超過700度，電錢會起3%。毋過若共稅厝分租隔間的房間公家用一粒電表，真簡單就超過700度，電錢百面會起著。雖罔台電講會使申請去鬥智慧電表，毋過這著愛厝頭家同意、誠厚工，問題真歹解決。(本則新聞標題、導言、內文皆為臺文)
一戶隔做幾若間的分租套房、佮分租雅房，因為厝稅較低，濟濟學生佮拄出社會的少年人、抑是弱勢者攏會選這款厝；毋過四月初一開始，一個月用電700度以上電價就會起3%，這款濟人蹛仝一戶的分租戶，就有可能超過，現此時有厝頭家開始烏白喝價。
崔媽媽基金會執行長 呂秉怡：「對一度6箍、6.5箍、7.5箍，到7.69箍攏有人喝，而且是厝頭家咧喝。佇稅厝族群內底，分租套房、雅房，是上脆弱的厝跤族群」
台電表示，分租厝型會使向台電申請智慧電表，予台電知影遮是分租戶，就袂共起電價；但是立委指出，這種電表厝頭家若無同意，就無法度申請，而且施工時間長、閣厚工，真僫解決問題。崔媽媽基金會建議，會使先對予厝跤通看著電費單開始解決。
崔媽媽基金會執行長 呂秉怡：「電費單仔內底有整體用電，特別的是伊有非常重要的是，當期每度電價這个部份，厝頭家以後就按這个當期每度電價來收費。但是無一定每个厝頭家，攏會予厝跤這張電費單仔，但是這陣查電費需要電號，佮用電戶名才通查」
台電配電處處長 楊顯輝：「所有用戶資料，攏會牽涉著用戶個人資料，到底敢會使去查，毋是你設戶籍的資料，會牽涉著真濟有爭議的問題」
立委要求，針對開放厝跤查電費，三禮拜內愛有階段性成果。另外現此時規定，厝頭家收電費袂使超過台電公告級距上懸價的天篷，煞有厝頭家共天篷當做樓地板，每個月攏收級距上懸價；基金會建議，應該修改定型化契約，規定收費標準以電費單仔頂懸的平均每度電價收費。內政部表示，閣需要研議。
鄭雅存/編輯
