台灣師範大學的文物保存維護研究發展中心，創辦以來有共真濟名畫救轉來，甚至畢卡索的畫攏捌佇遮修復，最近也頭一擺對外招台大系統的學生，希望冗早培育修復師。
細膩修復手中的畫，佇台師大的文物保存維護研究發展中心，專長是用科學修復名畫，親像陳澄波、郭雪湖等等畫家成千件重要作品，閣有畢卡索的名畫，攏捌佇遮搶救過。
「譬如講我這馬需要知影，這个黃色的所在，可能有啥物元素。」
文保中心成立十二冬，這陣也有教授推動將過去修復的文物資料建立數據庫，希望強化未來材質判斷。
師大美術系教授 林震煌：「以前是靠阮科學家，用目睭、用經驗去看，圖譜是啥物，希望將來通透過大數據，用AI通調到上大可能是啥。」
畫的修復需要迒領域人才，文保中心的修復師無10个人，講無需要真濟人但絕對袂當無人，培養一个全面的修復師著愛７、８冬以上，真濟人一開始有熱情，毋過尾仔煞放棄。今年頭改開設文化部文物保存修復學分學程，招募台大系統三間學校對文物修復有興趣的學生，希望提早培養人才。
台師大文保中心主任 張元鳳：「碩士的時陣，真無容易考入來，結果你發見，毋是像你想的按呢，予文物保存修復，閣較通對少年時(大學)開始，就會當緩解拄才講的，因為一个優秀的修復師，伊需要真長期間來培育。」
文保中心表示，修復一幅畫愛一個月至兩冬，不只時間，材料技法攏愛真清楚，學生若有興趣冗早接觸，就通提早了解這个領域。