鹿草焚化廠ROT經營 成做阿里山油菊復育地

共阿里山油菊種落土內底，嘉義縣鹿草鄉的糞埽焚化廠，佇廠內永續循環示範園區內底，配合嘉義大學欲來復育這个臺灣原生種的植物。

嘉義大學教授 張坤城：「伊閣是咱臺灣的特有種原生種，所以才會閣較積極來復育這个部分。而且大量的推廣出去予逐家來種，就是希望除了杭菊以外，嘉義未來檢采有一个會當佮杭菊仝款的新興產業。」

過去燒糞埽的焚化廠，攏是社區無希望倚的設施，嘉義縣政府透過促進民間參與公共建設法的方式，結合政府佮民間企業，予焚化廠毋但只有燒糞埽，會當成做生態、運動、教育的空間。

財政部促參司長 李建賢：「毋但是焚化爐的一个整改已經完成，甚至閣共荷包嶼附近一寡植物攏會當來，佇這个場域內底來復育，所以這个民間參與公共建設，是一个會當完成的目地。」

嘉義縣長 翁章梁：「這个園區伊有多樣性，對整個生態的保育，包括油菊的復育，所以這款空間未來毋是鄰避設施，這款的空間佮鄉親的親近性會閣較好。」

焚化廠嘛佮嘉義大學合作，利用阿里山油菊，開發一寡商品。嘉義大學表示，目前廠內已經有種三分外，是平地復育面積上大的基地，希望未來會當豐富油菊的基因，提懸這個植物的生長，替嘉義增加新的農業產品。