太陽.地球.火星排一列 盈暗上倚.來看"火星衝"

影片模擬火星佇這年當中，12月初八這工看起來明顯較大，天文館講，這工號做火星衝，就是火星離地球上近的時，大約兩冬外發生一擺。

台北天文館研究助理趙瑞青：「咱知影地球踅太陽是一冬，公轉太陽是一冬，但是火星公轉太陽是兩冬，加上火星離咱地球較近，所以你欲三粒拄排一條線，你欲去算IN的會合週期，伊的會合週期，就會落佇兩冬閣加淡薄。」

天文館表示，火星衝的形成原理就是太陽、地球、火星成做一條線，這時陣火星會離地球較近、較光。研究員講，雖然初八下晡1點42分是推測真正連做一條線的瞬間，但是只要氣候穩定到暗時、甚至前後幾工，天文迷攏看有，只是欲佮今年的火星拄好大細的就愛等。

台北天文館研究助理趙瑞青：「後一改你欲看著，像今年仝款遐爾大的火星衝，你就必須愛等到2033年，你看著的火星衝，才會參今年差不多。」

天文館解說，「衝日」干焦外行星才會發生，因為佮火星連線所以號做火星衝，其他親像木星、土星等等攏是一冬一改，只有火星是兩冬一改較特殊。另外最近也有流星雨通看，12月14是雙子座流星雨，估計上濟一點鐘通有150粒。