嘉義縣飼養烏魚的面積欲到200公頃，一年產量有900噸左右。今年受著氣候影響、飼料成本嘛增加，閣有一寡魚塭轉做光電，產量減少。目前產地的價數，烏魚子8兩大約1000至1050箍，比舊年貴50箍，嘛是25年來起上懸的一改。
新鮮的烏魚對車斗倒落來，剖烏魚子的工人跤手扭落開始無閒，毋過業者講，今年到今天氣猶是誠熱，所以烏魚子的品質佮大細，加減會受著影響。
養殖漁民 陳小姐講：「舊年十月十一月，攏沓沓仔有寒流落來，像今年到今南部攏無啥物較寒的日子，因為烏魚子上主要著愛天氣寒才會好，今年攏袂寒，所以逐家攏毋是誠理想」
這陣仔，嘉義縣沿海的養殖業者當咧剖烏魚子，雖然載烏魚的車猶是一台接一台，但是數量佮品質和舊年比起來，確實是有差。
冷凍行業者 蕭博忠講：「養飼的烏魚這馬數量少，因為無好飼，原物料攏起價，人工物資嘛起價，所以講今年漲幅是這幾年上濟，差不多上少愛起成半至二成」
業者講，烏魚愛飼三年才會當來收烏魚子，風險佮成本攏誠懸，所以開始有一寡仔漁民轉去種電，所致今年起價的程度，嘛拍破25冬以來的紀錄。
