癌症病友騎鐵馬環島10日 宣導運動.勇敢抗癌

30人的車隊寬寬仔騎入來到新北市政府的市民廣場，徛佇終點站的新北市副市長陳純敬，共獎牌送予每一个抗癌的生命勇士，肯定in的毅力。癌友廖秀芬講，運動幫助伊行出人生的烏暗期

癌友 廖秀芬講：「我想這毋是咱的終點，這是咱飛越人生困難，欲迎向另外一个人生的起點。咱戰贏癌細胞，咱已經撐過癌症的衝擊，我相信咱會當閣較健康的活落去」

今年是臺灣抗癌協會第十冬邀請癌症病友騎車環島，in用十工的時間、一工110公里的路程，完成這个任務。副領隊張清耀講，一路上逐家互相鼓勵，用性命去影響性命

癌友環島副領隊 張清耀講：「阮欲共各地的人講，阮就是遮爾健康，阮雖然著癌，但是阮有這个標誌，阮一直紡、一直踏，共癌踏佇跤底」

「共癌踏佇跤底」，一句話傳達出病友對抗癌症、面對挑戰的決心，臺灣抗癌協會鼓勵其他病友，明年繼續來用跤踏車寫歷史。