大龍峒保安宮保生大帝聖誕 受登錄無形文資

對臺北市文化局長李麗珠的手接過證書，大龍泵保安宮予市政府認證做臺北市無形文化資產的保存者，因為in逐年舉辦保生大帝聖誕慶典。

大龍峒保安宮董事長 廖武治講：「阮嘛一直足頂真，希望共這重要的民俗傳承落來。若是阮保安宮無傳承，拄仔局長嘛是講，欲到佗位演出家姓戲？到佗位去放火獅？」

舊曆三月十四，保生大帝聖誕前一工，保安宮會舉辦踩街活動，暗時會放火獅，隔轉工用古法三獻禮佮過火的儀式替保生大帝祝壽。對1994年開始擴大舉辦，成做保生文化祭，嘛共原本在地居民請的家姓戲，轉變做邀請各戲曲團體表演的舞台。

中研院院士 李豐楙講：「臺北市欲成做一个偉大的城市，當然，咱需要101，咱需要總統府；但是咱閣較需要的是軟體，咱需要的是像保安宮按呢的文化基地」

文資審議委員李豐楙表示，保安宮舉辦文化祭，予傳統藝術文化有機會表現、傳承落來，因為按呢肯定保安宮。文化局表示，十二月會佇剝皮寮舉辦無形文化資產的展覽，歡迎民眾做伙來體驗臺北文化的媠。