罕病患者考牢律師 望用法律替身障者爭權益
張君豪／新竹報導
發布時間：
更新時間：
目次
新竹有一个罕見疾病患者陳俊翰，自細漢就予醫生診斷出龍骨筋肉萎縮症，毋過伊無想欲予命運拍敗，骨力讀冊，毋但佇2006年律師高考第一名，閣去美國讀法學碩士，頂個月又閣提得法學博士轉來台灣，講欲用法律替閣較濟身障者佮病患爭取權利，改善生活。
自細漢就得著龍骨的肌肉萎縮症，陳俊翰坐佇輪椅，這馬規身軀賰目睭、喙佮一根小指頭仔會使活動，有當時嘛愛倚靠媽媽佇邊仔鬥相共，雖然行動無方便，毋過伊頂個月才對美國密西根大學提著法學博士轉來，而且決心留佇台灣奉獻。
律師陳俊翰表示：「若是我留佇美國，有可能我家己一个人，日子會使過了真好勢，毋過我若是轉來台灣，我希望會使予閣較濟人的生活變好。」
陳俊翰媽媽表示：「臺灣的朋友誠希望伊會使轉來台灣，替身障者出聲，其實是有淡薄仔感覺兩難。」
陳俊翰講依照目前的健保制度，伊所使用的藥仔干焦提供7歲以下的病患，所以伊的身體機能漸漸退化，伊想欲來研究相關機制，希望會使改變用藥的標準。
律師陳俊翰表示：「咱閣有真濟愛去進步的所在，我感覺這是我轉來台灣，我想欲發揮家己的力量去貢獻的所在。」
陳俊翰講，未來欲用家己學著的法律專業，來替閣較濟的身障者佮病患爭取權利，改善生活。
專題｜改造地獄路 台灣行人路為何難行？
