前新竹市長林智堅，因為論文風波一直滾絞，昨昏宣佈退選桃園市長，換立委鄭運鵬代替伊出戰。今仔日林智堅、鄭運鵬，佮現任的桃園市長鄭文燦，做伙去宮廟拜拜，3个人徛仝台，展現拚贏選戰的決心。毋過，國民黨佮民眾黨猶原共論文風波咬牢牢，質疑鄭運鵬進前直直替林智堅講話，選民攏看在眼內。
因為論文風波，民進黨前新竹市長林智堅、昨昏宣佈退選桃園市長，改由立委鄭運鵬出戰。十三鄭運鵬參現任市長鄭文燦到桃園明倫三聖宮參拜，林智堅猶原做伙出現，強調離開選戰，是為著捍衛家己的清白。
民進黨桃園市長前參選人，林智堅表示：「我是先發投手，受傷了後，佇教練團的指揮之下先落場，但是咱有王牌終結投手，運鵬上場。」
民進黨桃園市長參選人，鄭運鵬表示：「咱佇真毋甘的心情之下，咱嘛予林智堅市長，來專心捍衛伊的清白佮權益。」
林智堅退選的消息來了真緊，壁頂林智堅的宣傳布篷攏猶袂赴拆落來替換。鄭文燦強調，民進黨的桃園隊是有韌性的團隊，會快速變換選舉策略。三个人嘛批評對手提袂出政見牛肉，干焦利用論文案件抹烏。包括國民黨參選人張善政、民眾黨參選人賴香伶，嘛隨共箭頭轉向鄭運鵬。
民眾黨桃園市長參選人，賴香伶表示：「鄭運鵬委員真正是予趕鴨上架，伊過去一直幫林智堅市長辯護、護航、背書，所以我猶是問彼句『伊佗位來的信心？』。」
國民黨桃園市長參選人，張善政表示：「一心替伊圓白賊話，桃園的民眾心中有一支尺。」
民進黨趕會赴佇九月初二候選人登記截止進前換將，桃園市長三跤㧣的選戰局勢，閣再出現新的變化。