中國軍演閣禁咱農漁產進口 漁民怨嘆歹生活

廣播：「中國大陸解放軍來台灣附近海域，進行海空實彈射擊，請船台遠離射擊區，若發現大陸船隻請回報電台」
呼籲漁船愛注意海面上的狀況，基隆漁會的漁業電台，受中國宣布8月初4到初7佇台灣海域操兵演練的影響，這幾日每一點鐘會放送一改提醒的訊息。
廣播：「請以下三隻漁船的漁友，愛遠離中國大陸演習區，愛較緊駛離。」
為著保護漁民的安全，電台會透過廣播呼籲漁船離開演習區域。拄才入港的漁民表示，目前外海攏無看著啥物狀況，毋過紲落來伊嘛毋敢出港矣。
漁民表示：「大部份揣彼漁場，有魚的點就佇遐射飛彈，莫出去好矣，飛彈若拍袂準就慘矣。」
裴洛西來台，中國除了武力恐嚇，嘛對台灣實施經濟制裁，禁止台灣出口白帶魚過去。漁民表示，無法度出口會予白帶魚的價數落落來。
漁民 朱勝煌表示：「若像最近這幾工仔白帶魚攏真好，濟的時內銷飽滇，像彼魚仔，白帶魚若傷過濟的時價數就差矣，以前就是咱釣轉來，若收收的是攏載去大陸外銷，彼價數真好。」
無法度出海掠魚，嘛無法度共魚銷去中國，濟濟漁船只好靠岸等待閣出港的彼工。