6/4教師資格考試無通補考 確診考生無奈求助

6/4就是高中以下學校佮幼稚園老師的資格考試,毋過這陣傳出有考生因為確診,無法度參加,而且嘛無補考等等的補救措施,規年的拍拚攏烏有去。今仔日就有確診的考生透過網路佮立委召開記者會,希望相關單位愛解決問題。

H小姐透過網路參與記者會,伊原本欲參加6月初4高中以下學校佮幼兒園教師的資格考試,煞佇5月29確診。而且相關單位攏講,無任何補救措施。毋但一年的拍拚攏烏有去,嘛因為愛考試通過才會使實習的規定,相連紲影響著實習計畫。

H小姐表示:「我彼時快篩陽性的時陣,我其實真躊躇,因為我知影通報,我就會失去考試的機會」、「我雖然無鼓勵,煞真會當了解考生就算有症頭,煞選擇無欲面對的心情。若是補考佮另外開考場
攏有難度,因為時間傷趕,至少佇紲落來的實習時間,會使予阮伸勼空間調整佮選擇」

教育部表示,到初一為止,這擺的考生有37个確診,佔整體0.38%。考慮著考試公平佮人力分配等等,無法度補考;嘛因為時間傷趕,無法度設置確診者專用的考場;實習時間因為法律規定,嘛無法度做改變。

教育部師資培育佮藝術教育司副司長 王淑娟指出:「阮佇短時間內,仝一年,阮若欲進行補考,愛確認考試內容的鑑別度,阮做素養導向的題型研發難度閣較懸,所以阮目前無法度辦補考,嘛無考慮補考的原因佇遮」

現場並無討論出解決方案,在場立委舉例,猶是有一寡仔學系的考生,就算有確診狀況、猶是會使參加學測第二階段的考試,希望會使佇一定的防疫措施之下,予確診者獨立的考場,嘛講會閣再發文要求教育部改善。

全台敬老金大調查

相關新聞