人講「歷來上硬篤」 新制14工教召今日報到
郭柏均 謝季潾／桃園報導
發布時間：
更新時間：
為著提升咱的後備戰力，新制的教育召集也起鼓囉。計共14工，逐工訓練10點鐘，會加強用銃的技術、行軍、閣有佇野外露營、煮食等等的訓練。今仔日頭一批接受教召的後備軍人，也佇桃園蘆竹報到。
教召員排隊報到、核對身分，新制後備軍人教育召集三月初五開始實施，一擺14工，予人講是上硬篤的教召。現此時國際上拄著露西亞侵略烏克蘭的戰事，袂少教召員攏認為，新制教育召集會當提升台灣的後備戰力。
教召員瞿先生講，「因為四個月 (軍事訓練役) 可能對in來講，可能認為要求無達標，所以就叫阮轉來做兩禮拜的訓練。」
教召員彭先生表示，「攏是學一寡仔有路用的技能，野營應該會學一寡仔野外求生技能，外宿之類的，對銃的訓練閣較熟手。」
新制教育召集兩禮拜期間攏無歇假，逐工訓練10點鐘，會加強銃方面的訓練，嘛有行軍、野營、野炊等等訓練，每一擺的行軍安排2到4工，至少10公里以上。頭一批總共400人左右，佇桃園市蘆竹區報到．這批教召員以防守林口海岸做訓練目標。
206旅三營中校營長張裕勝表示，「區分做第一階段召員報到佮編成，第二階段專長複訓，第三階段是編制武器射擊，佮連以下戰鬥教練，第四階段是營戰鬥訓練，第五階段裝備保養、收回佮解召。宿營的部分阮會結合射擊訓練，第三个階段編制武器射擊的時陣，結合射擊訓練實施。」
為著防疫，除了一般的酒精消毒、磅體溫、掛喙罨以外，嘛會佇報到的時、佮一禮拜了後做快篩試驗。行軍野營的部分，嘛減少每个布棚的人數，保障安全。
2022杭州亞運 台灣百金之路
