要求動物保護入憲法 動保團體去立法院抗議

立法院修憲委員會今仔日舉辦第二場公聽會,動物保護團體到立法院門口,要求立委聽動物保護列入憲法的訴求。立法院各政黨雖然攏有委員到現場表達支持,毋過嘛攏咧推捒責任。

打扮做動物的模樣,做陣對立法院群賢樓出發,遊行到立法院大門口。動物保護團體17召開記者會,傳達希望將動物保護列入憲法的訴求。學者表示,動物保護法層級較低,佮其他權益有衝突時,定定攏較弱勢。

台灣動物保護行政監督聯盟秘書長,何宗勳表示:「所以目前所有的動物保護,攏是用動保法佮野保法,佇民法內底,動物算物品無算性命,因為無上懸的動物保護入憲做基礎,所以真濟動物福利攏無法度兼顧。」

台灣動物社會研究會執行長,朱增宏表示:「目前真明顯的就是神豬的問題,祭拜本身毋是問題,用全豬來祭拜嘛毋是問題,但是神豬後來演變成,你愛共伊飼到足重,愛灌食,予伊無法度行動。」

台灣動物保護法律研究協會理事長,顏紘頤表示:「以前的時陣拄著就一定愛體諒,因為文化權攏會較懸,信仰權攏會較懸,今仔日若是講動物保護,嘛會使列入憲法內底的時陣,就無一定講因為你咧拜拜,所以你較大,因為你是文化,你較大,無一定。」

民進黨、國民黨、民眾黨三黨派立委嘛分別到場表達支持的立場,但是國民兩黨是互相批評對方無配合。

民主進步黨立委,洪申翰表示:「毋管是執政黨抑是在野黨,其實目前攏佇咧聲聲呼喚,國民黨轉來修憲。」

中國國民黨立委 洪孟楷表示:「國會上大的民進黨,竟然民進黨的朋友佇頭拄仔的發言內底,閣講是在野黨的責任。」

動保團體批評,這屆有75个修憲提案,7成是政治改革,3成是民生相關,動保入憲相關提案總共8案,煞無得著詳細的討論。嘛呼籲各政黨愛有動作,若無得著正面回應,未來無排除有更大型的行動。

全台敬老金大調查

相關新聞