受著疫情的牽連，探索夢號遊船停航超過半年，損失超過7億。佇配合防疫規定的條件之下，今仔日恢復營運，兩百外位遊客期待欲佇船頂迎接新年。
郵輪業者的工作人員無閒做最後的整理，12月31下晡四點予遊客報到，暗時九點出發，拍算1月初2轉來基隆港。
搭乘郵輪遊客：「因為伊是復航，復航就是上清氣的。」
搭乘郵輪遊客：「核酸檢測足貴，四千一。船票兩千五，按呢加起來就六千六。我希望袂予我失望。」
受疫情影響大型郵輪「探索夢號」今年5月預防性停航，交通部航港局表示，探索夢號佇這個月27完成防疫工作檢核和緊急應變演練，對整個防疫有信心。
交通部長王國材：「整個探索夢號伊欲重新啟航的過程，包括指揮中心佮咱交通部攏做過真濟檢測，這馬大概攏無問題。」
交通部航港局北航中心主任張德義：「有預約的人數大概是兩百人左右。有疑似症狀的就會先去隔離艙，伊是正壓的空調，所以伊的空氣吹落來了後，攏是向外口吹，伊的病媒欲佇郵輪內底湠機率真低。」
交通部表示落船進前全部旅客會閣需要做一改PCR檢驗，確認陰性才通落船。郵輪業者希望以嚴格的防疫標準，予明年郵輪觀光閣再興。
