時代咧進步，臺灣真濟廟寺整修，毋但愛有傳統藝師，這馬嘛會使用科學儀器鬥相共，予古蹟文物的保存閣較久長，親像臺南國定古蹟，祀典大天后宮，一寡珍貴壁畫的壁癌真嚴重，佳哉透過科學檢測，已經沓沓仔修復。
徛佇壁畫頭前，團隊利用熱影像儀器咧檢測，壁畫的溫度敢有正常。
因為這幅陳玉峰大師的壁畫，有的彩繪已經烌去矣，壁內底的鹽份佮曝日，攏是造成彩繪損害的原因，欲共修復，親像人咧敷面仝款，in開始佇壁畫頂面糊面糊。
國立臺灣藝術大學古蹟藝術修護系助理教授，邵慶旺表示：「敷泥材料，遮的材料上主要就是，咱遮的鹽份透過水共吸收出來，吸收出來以後，伊會走去咱脫鹽的材料面頂。」
台灣藝術大學佮台南藝術大學團隊，這三冬來一直佇大天后宮修復壁畫，遮攏總有32幅壁畫，攏受著鹽害，就是咱所講的壁癌，團隊為著欲解決，利用各種科技佮儀器，了解壁體的成份，閣有水份佮鹽牢佇佗位。
國立臺灣藝術大學古蹟藝術修護系助理教授，邵慶旺表示：「阮上長的時間捌脫到六七十遍，咱袂使講咱為著予伊媠媠的，咱就毋甘開時間修理，修理好你可能，咱講的治標無治本，按呢就是無伊的效果，」
大天后宮，是台灣第一座官方起的媽祖廟，是國定古蹟，進前修護，大部份攏是重畫，無幾冬就又閣烌去。
全台祀典大天后宮主委，曾吉連表示：「從民國82年到這時，幾若擺的修復，攏無可能斷根，這擺看會當按這个脫鹽的工程，共這个壁畫攏總做好勢。」
國立臺灣藝術大學古蹟藝術修護系助理教授，邵慶旺表示：「遮的師傅遮的畫師，𪜶用的材料、𪜶的技術、𪜶的美感，佮咱這馬完全攏無仝款，所以阮攏會希望盡量共伊保留落來。」
除了共壁畫脫鹽、重新修復，現場嘛有這兩台負離子產生器，利用負離子去敆油煙、汙染物，壁畫就會當維持清氣，袂閣烏去。台灣的文資保存觀念，已經對古蹟修復升級到管理佮維護，運用最新科技來保護廟寺的文化資產，文資處會推廣到其他所在。