入選WHO試驗疫苗 高端:已完成4000人收案

臺灣生產的高端疫苗,佇頂個月予WHO選做團結試驗疫苗,這馬有新進度囉。高端表示,目前已經佇三个國家,超過40个試驗中心,完成4千个受試者收案,目標是欲提著國際認證。針對也有風聲國內民眾可能是注高端才會面部神經失調,醫生表示:目前無證據通來證明是佮疫苗有關係。

咱國生產的高端疫苗這馬閣有新進度,高端對10月26予WHO揀做團結試驗疫苗了後,這陣佇哥倫比亞、馬利和菲律賓3个國家,超過40个試驗中心,已經收案完成4000位受試者,目標取得國際認證。

高端副總經理,李思賢表示:「除了WHO這个計畫以外,阮其實佇南美洲的巴拉圭,阮這馬嘛臨床三期已經收案攏收好矣。另外阮佇歐洲佮EMA歐盟法規單位,繼續咧佮𪜶討論講,咱馬佇歐洲做一个臨床三期試驗。」

高端副總表示這陣台大和長庚當咧做AZ和莫德納注了,第二支注高端的數據,部立桃園病院也咧做高端第三支加強針試驗,估計明年二月進前會閣有進一步資料。不過最近傳出疑似注高端了後,面部神經失調的案例,醫生表示目前並無證據證實就是疫苗所致。

台大小兒感染科醫師,李秉穎表示:「到目前為止猶無確實的證據顯示講,注疫苗了後面部神經麻痺的發生率,明顯比無注疫苗的族群猶懸,所以包括高端疫苗在內,目前的新冠疫苗攏無被證實,佮顏面神經麻痺有直接關係。」

全世界新冠肺炎病例數已經超過2億5千萬,5百外萬人死亡,疫情繼續湠加上國際疫苗分配無齊勻,高端表示會續繼配合WHO團結試驗疫苗團隊,預估收四萬位受試者資料,希望替全球群體免疫做出貢獻。

相關新聞

專題|全台敬老金大調查