網衝用AI換面做春宮片 數位性暴力犯罪引關注

涉嫌利用DeepFake深度偽造技術，共別的網衝佮明星等人面的圖，製作做色情影片，真有名的網衝小玉，頂日仔去予檢警約談。這種深度偽造技術成做犯罪的工具，受害者之一的YouTuber奎丁，就捌翕影片，呼籲重視數位暴力問題。

YouTuber奎丁表示：「對愣去到難苦，甲這馬有淡薄仔受氣，你憑啥物烏白用我的肖像，咱家己嘛閣較應該愛去重視，數位科技產生新型的性別暴力犯罪。」

這馬科技進步，新型態數位暴力犯罪，是愈來愈捷看見，台灣數位女力聯盟表示，目前擬真技術愈來愈厲害，民眾真僫查證，嘛真歹分辨是真是假，致使造成誤會。抑若數位性別暴力，毋但對女性造成傷害，甚至想欲掠著幕後嫌犯，嘛真無簡單。

台灣數位女力聯盟秘書長張凱強表示：「受害者毋敢出來報案或者是提告，因為𪜶煩惱這款的影像，無法度移除，其實會致使𪜶去予犯罪集團惡意報復閣較嚴重，抑若像Telegram這種加密公司，其實𪜶根本袂共這款的資料，提供予警方，這改查著的感覺是運氣好。」

數位女力聯盟也講，數位性別暴力，已經成做全球性的問題，深度偽造技術去予人烏白濫糝使用。濟濟年前，美國真有名的電影明星蓋兒加朵，伊的影像就捌予人烏白鬥，針對擬真影片潛在的威脅，有資安專家講可能包括國安問題。

台科大資管系教授查士朗表示：「就是被偽造的時陣，講出對某一寡族群歧視的發言，若按呢自然也會造成對彼个政治人物的無信任，或者是一寡影響，所以這个技術，確實是需要去重視。」

資安專家提醒，這種擬真技術，會當在伊變造政治人物講的說，欺騙民眾，真有可能予人利用來威脅國安等等的議題，多媒體技術發展，愛按怎因應科技造假，帶來的威脅，成做真大的問題。