全臺灣三級警戒已經2個月，過去假日人山人海的新竹內灣老街，因為疫情生存面臨考驗，目前已經有20外間店頭，因為租金的壓力，無法度繼續落去，只好退租，閣有擔仔商講領無紓困金，這馬連食飯攏有困難。
遠遠看過去，規排店頭有營業的無幾間，這是新竹內灣老街目前的狀況，自5月進入三級警戒了後，這搭強欲看無觀光客，真濟擔仔商付袂出店租，選擇離開。
內灣商家表示，「攏無人生意哪會好，你會使看著阮逐個月閣愛納厝稅，(是毋是真濟店頭攏歇睏矣)，攏已經收起來矣，你看這真濟攏搬了了。」
商圈理事長講，這爿做生意的大部份攏算是路邊擔仔，因為無發票嘛無營業證的關係，所以嘛無法度申請紓困。內灣商家講，「阮去申請啥物攏無，攏請袂出來。」
內灣形象商圈理事黃仕鈞表示，「阮內灣大概有三百外間店頭，猶毋過有統編的店，差不多只有十分之一 大概三十間，目前阮統計過有統編提著紓困金的目前干焦四間。」
內灣多數的擔仔商，攏是因為疫情關係自主暫停營業，這馬干焦會當寄望疫情沓沓仔轉和，恢復往過的人潮。
