彰化公共跤踏車7月換廠商 3禮拜內袂當借車

彰化縣的公共跤踏車系統,7月欲換新廠商,煞因為系統的資料轉換愛2、3禮拜;這段時間民眾就無法度借車,就有民眾表示,按呢誠無方便。

彰化縣政府的公共跤踏車系統,對2014年5月開始提供服務,包括彰化市、員林市、鹿港鎮計共有68搭的租車站,原本是委託捷安特公司經營,但7月初1開始換新廠商運點科技接手,進行新舊系統的資料轉換,會先暫停營運2、3禮拜的時間。

民眾表示,「就是一個空窗期,當然in(縣府)是講拄好學生歇熱,毋過平常一般大眾嘛是有咧用,我個人使用的機率是足懸的,可能出去買物件,抑是來車站我感覺足方便。」

彰化公共跤踏車自106年統計到110年,逐個月平均有17萬人次使用,其中學生占七成以上,縣政府城市佮觀光發展處表示,彰化縣是頭一个將捷安特公共跤踏車系統,進行轉換的縣市,需要參相關的合作廠商接接。

彰化縣城觀處長田飛鵬,「因為這个系統咱較早攏毋知,所以規个系統去了解了後,因為像拄才講的,毋是干焦營運公司爾,伊必須愛佮悠遊卡、一卡通,原底甚至你有信用卡,閣有中華電信、台電遮的攏愛另外簽約,所以這个部份不管啥人來做,若原本的系統(轉換)一定攏會有空窗。」

城觀處表示,資料轉換完成就會開放借車,九月開始陸續共1650台的跤踏車換新,其中包括300台電動輔導車,目前租車點維持原樣,但因為新的跤踏車無租車柱,靈活度較懸,未來也會針對觀光客做租車點的評估。

全台敬老金大調查

相關新聞