臺北市的好心肝診所，竟然予一般的民眾注疫苗，臺北市政府調查了後，發現好心肝診所竟然違規，先予志工注疫苗，市政府決定欲共診所罰200萬，而且取消注疫苗的合約。市長柯文哲承認錯誤，認為是內部的管理出問題，會移送政風處調查。
貼出新冠肺炎疫苗的接種紀錄卡，頂懸閣有印好心肝診所的印仔，前立委林靜儀指出，臺北市中正區的好心肝診所替蓋濟人注疫苗，要求政府調查臺北市疫苗的流向，敢有毋是第一類到第三類的人，違規槍代先注新冠肺炎的預防射？
前立委林靜儀:「簡單講這个問題就是，台北市衛生局到底有造冊無，到底有照規矩來注無，本來衛生局的局長講，所有的疫苗攏是病院分的，若攏對病院分的，哪會有診所出來注，敢真正是病院注袂了拜託診所。」
中央流行疫情指揮中心發言人莊人祥:「公開的網路佇五月十幾號，是無公布好心肝診所，但是阮問過了後，In講6月初2伊是in的合約接種院所。」
台北市副市長黃珊珊:「今仔日早時的稽查結果，阮要求in注佇咧，第一類到第三類醫事人員，有一大是無符合相關規範。所以阮今仔日會罰上懸金額200萬，本來是希望in做注文的合約診所，這个資格嘛會取消。」