蘭潭步道當封鎖 民眾偷入煞身體各樣送病院 | 公視新聞網 PNN

蘭潭步道當封鎖 民眾偷入煞身體各樣送病院

為著防止群聚造成疫情傳播,嘉義市除了共公園、遊樂設施封起來,也有封蘭潭水庫後山的步道;煞有民眾違反規定入去運動,閣因為人無爽快叫救護車。嘉義市政府表示,會依照傳染病防治法處罰。

這位民眾佇嘉義市運動到一半,身體雄雄無爽快,趕緊叫救護車來,只是伊運動的所在,因為疫情的關係,早就佇5月27就封起來。
 
附近民眾:「防疫的時陣當然嘛封起來,抑無人湠人那會通,袂通,害著家己,害著別人。」
 
嘉義市政府消防局蘭潭分隊長李明泉:「彼爿有封閉,禁止進入,阮到現場了後評估旅遊接觸史,血糖,閣有辛辛那提中風測試攏正常,後來就是予伊一寡基本的救護處置了後就送去病院。」
 
嘉義市政府為著欲減少疫情傳播,共一寡民眾定定會群聚的所在封起來,嘛包括蘭潭後山的步道嘛,但是猶是有民眾違反規定,市政府表示,封起來的所在,民眾這馬若是閣入去,是袂勸導,會直接開罰。
 
嘉義市觀光工程科科長林靖淳:「阮知影這件代誌了後,目前當咧進行裁罰的行政作業程序,這个裁罰 阮會依照傳染病防治法,罰3000箍到15000箍的罰鍰。」

消防隊表示,患者堅持愛送到嘉義縣的病院,嘛是不當使用救護車,所以嘛有開收費告知單,患者嘛有同意。市府強調,疫情期間猶是請民眾儘量配合規定,毋通浪費社會資源,甚至造成疫情的破口。

相關新聞

留言區