疫情送貨量加倍.算加班費就無獎金 工會:無合理
發布時間：
更新時間：
臺灣疫情緊張，貨運業變甲真無閒，貨運相關工會表示，現時有一寡貨運人員的工作時間可能超過15點鐘；而且這馬有業者主張，司機干焦會使佇加班費佮送件獎金內底選一項領，in感覺是真無合理。
宅配通回應，公司會依法予司機加班費，毋過取送件獎金、法律是無規定一定愛提供；記者問著，這毋就代表，司機需要放棄佔薪資比例上懸的取送件獎金，才會使提加班費？宅配通講，這个薪資結構的問題，會閣來研議。
全台灣三級警戒，貨運業變真無閒，貨運相關工會發聯合聲明講，升級三級警戒了後，貨運人員的送貨量有可能變重倍（tîng-puē），有人早時7點半開始上班，到半暝12點半才轉去厝內，工時超過15點鐘。
工會講，司機的薪水一大部份是「取送件獎金」，但是佇這馬司機定定需要加班的時陣，宅配通公司煞主張，欲加班費就袂使閣領這个獎金。
勞動部回應，針對疫情的狀況，有特殊的加班規定，會使延長工時。但是特殊加班的加班費，公司是需要事前經過工會、抑是縣市政府的同意，才會使來實行；若是緊急的狀況，嘛需要事後報備審查。針對宅配通的案例，可能需要另外調查。
台灣汽車貨運暨倉儲業產業工會理事楊正義：「你平常時仔，你若是以一點鐘送二十件的貨，你一百件至少就愛五點鐘，這是送的時間爾，譬如講拆理貨，物件愛籠車請出來，上車、排單、疊貨等等，遮的時間攏猶未算在內，你這馬甚至一个人平均攏愛百二、百三、百四、百五件。」
楊正義表示：「延長工時的加班費這个部份，佇宅配通公司內底，超過7點的加班費是無的，你愛申請。公司逼迫阮勞工，阮今仔日欲加班費抑是欲取送件獎金，加班費這个物件是法律予阮的保障，企業應該予阮的，哪會是員工去兩个選一个。」
宅配通回應，公司會依法予司機加班費，毋過取送件獎金、法律是無規定一定愛提供；記者問著，這毋就代表，司機需要放棄佔薪資比例上懸的取送件獎金，才會使提加班費？宅配通講，這个薪資結構的問題，會閣來研議。
