臺史博收藏8千本尪仔冊 當籌備國家漫畫博物館 | 公視新聞網 PNN

臺史博收藏8千本尪仔冊 當籌備國家漫畫博物館

國家漫畫博物館當咧籌備,佇臺南的臺灣歷史博物館,最近買著一批二戰時期,臺灣的尪仔冊文物,其中包括1960年代上搶市的兒童雜誌「王子」,王子雜誌的創辦人-蔡焜霖嘛來到位,講起50外冬前、為怎樣欲創辦這本兒童雜誌。

囥佇桌仔頂的,攏是早期珍貴的兒童雜誌佮尪仔冊,其中王子雜誌是足濟人做囡仔時的記持,創辦王子的蔡焜霖,由文化部官員佮國家人權博物館館長陪同,來到臺灣歷史博物館,伊看著王子的創刊號佮遮爾濟收藏,表示足感動,伊嘛講起五十幾冬前,為啥物會創辦王子。

經歷過白色恐怖的蔡焜霖,當時為著濟濟漫畫家佮作家,才會佇1966年創辦王子,而且創刊就印兩萬本,彼時陣真搶市,嘛是1960年代真重要的雜誌。

毋但王子雜誌,現場閣有「東方少年」、「學友」等等,攏是彼个年代的尪仔冊的雜誌,臺灣歷史博物館對舊年開始籌備國家漫畫博物館,已經收藏八千外本台灣的尪仔冊文物,親像蔡焜霖先生,這款尪仔冊產業從業者的故事,IN攏當咧整理,希望佇六月進前會當完成軟體相關的規劃。
 

相關新聞

留言區