臺南下營拋繡球 望明年結合七夕擴大辦

八月15是中秋，千金小姐拋繡球。往過是8/15才有咧拋繡球。佇臺南下營海墘本家，也有舉辦拋繡球的活動，甚至講明年的七娘媽生，欲舉辦拋繡球比賽。

姑娘徛佇樓頂，將繡球丟落樓跤，看啥人接的著。佇古早時，無通自由戀愛的時代，若想欲嫁予心愛的人，繡球就愛拋予準。

舉辦這個活動的下營海墘本家，原本是仕紳曾伯仁1958年起的舊厝，是予曾家宗親住的所在，毋過已經拋荒幾落十年。經過整修的曾家本家，用下營的舊地名「海墘營」來號名，成做這馬的海墘本家。因為這棟建築本身就誠有特色，2樓閣有真闊的平台，才會有試辦拋繡球活動的想法。

這場活動毋但有拋繡球的活動，嘛邀請社區的老大人來表演娶新娘，連媒人婆攏妝娗共媠噹噹，唌誠濟民眾來體驗傳統活動，予全國商圈總會，向望明年會當佮市府的舊曆7月初7活動結合，擴大舉辦盛大的拋繡球比賽。