臺南東山的吉貝耍青年，為著回報部落，轉去為庄內的長輩、學生囡仔剪頭毛，濟濟人為著欲看鑠奅的義剪車，攏來到現場，意外予現場變甲真鬧熱。


扭掠的刀法，才無幾下仔功夫就絞好一粒頭摠，in是出身吉貝耍的部落青年，自底佇臺北的頭毛店食頭路，出師了後，決定欲轉來，為部落的老幼大細剪頭毛，貢獻家己的專長，義剪回報鄉親。


利用舊版、已經汰換的露營車，改裝做一台鑠奅的義剪車，對2018年開始的義剪活動，全國走透透，到今，已經走遍超過40个鄉鎮。為著予庄內的學生囡仔，會當打扮清爽，歡喜去上課，這也已經是in第二改轉來為部落義剪矣。


青年有心回報，公司提供贊助。長期研究在地的文史工作者段洪坤表示，透過義剪活動，毋但會當予部落內的獨居老人較願意踏出門，做伙開講、運動，濟濟人為著欲看這台鑠奅的義剪車，專工來到現場，嘛予這陣的庄內，變甲真有活氣。

記者 綜合報導