最近天氣冷 全臺非創傷OHCA.一氧化碳中毒增加

逐家排隊領外套，最近天氣真寒，尤其早暗的低溫攏無超過十度，予人冷甲爍爍顫，彰化就有民間團體啟動低溫關懷，發外套予寒士、開放臨時歇暝服務，予有路無厝的人

人安基金會彰化平安站站長 游山河
這馬早暗溫度有較低，有一寡心血管疾病的朋友，若佇外口會較危險，平安站遮 (天氣)15度以下有開放，暗時臨時安置，予一寡仔有需要的人來遮(歇暝)


天氣冷吱吱，也予病院急診人數增加，根據消防署的統計，這個月逐日攏有將近30人非創傷OHCA，尤其是拜四人數來到40人。

彰基醫學中心急診暨重症醫學部主任 邱俊杰
1月初6開始 因為天氣寒，有幾類的病人有增加，主要是高血壓族群，閣有高血壓引發的併發症病人為主，另外閣有消化道出血的患者，嘛有明顯增加

除了OHCA人數增加，消防署嘛提醒最近寒流到位，民眾窗仔門關傷絚，用gá-suh熱水器洗身軀、或者是炒菜攏有可能會造成一氧化碳中毒，月初到今攏總有7人送病院。

消防署危險物品管理組科長 王佩琪
其實只要有使用著gá-suh的狀況，氧氣不足就會造成著火無完全，產生一氧化碳所以佇往過，嘛會有少數案件伊會有民眾，佇厝內有燒炭取暖，造成一氧化碳中毒的案例

消防署也提醒，捷造成一氧化碳中毒的原因，佇室內裝gá-suh熱水器、露台窗仔門無拍開、灶跤無通風，閣來就是排氣管裝毋著，一定愛裝白鐵仔才是正確的。消防署提醒民眾，裝熱水器一定愛請合法的師傅，若無證照烏白裝，上重會當罰五萬箍，尤其是過年欲到矣，真濟民眾會煮火鍋或者是燒火爐，攏愛特別注意。

記者 楊舒晴 鄭亞宣 林郁凱綜合報導