高科大期尾考霆警報 校方:鋰電池爆炸待查明

火災警報器
請往安全門方向離開
砰(爆炸聲)

學生囡仔照指示往安全的方向撤離，才行來到走廊就聽著砰一聲，疑似有物件爆炸。高雄科技大學旗津校區的行政大樓，初九倚晝雄雄火災警報器一直霆，因為這禮拜是學期尾的考試，學生囡仔考試考煞，就開始歇寒囉，有人當咧考試寫甲一半雄雄狂狂走出來，嘛有款行李準備欲轉去的，一想著逃命的彼當時，到今心肝頭猶閣咇噗tsháinn。

高雄科技大學 陳同學
阮一開始當做咧演習，尾仔就想講走出來看覓，人就講火燒矣

高雄科技大學 黃同學
就聽著爆炸，然後警報就開始霆，阮就全部攏落來矣，然後期末考就暫時結束按呢，(敢知影是啥物物件爆炸啥物造成的)，鋰電池

消防隊到位的時陣，現場已經無火，干焦看著一粒細型的鋰電池咧衝煙。校方表示，這粒鋰電池是輪機系空氣汙染監測設備用的，物件是囥佇咧老師的研究室內底，彼當陣老師當咧改考試單仔，發現電池家己燒起來，就趕緊共伊徙出來走廊拍火。

聲音來源 高雄科技大學副主任祕書 侯智耀
是空氣污染監測設備用的鋰電池，彼當陣老師有隨做緊急處理，嘛有通報消防單位，這改的意外無師生人員受傷

校方表示，鋰電池是老師進前做研究用的，後來就拔起來囥佇咧研究室，是按怎會家己燒起來，閣需要等待進一步的調查，不而過學生表示，電池徙出來拍火猶閣一直衝煙爆炸，學期的最後一工用按呢來結束，確實有淡薄仔刺激。

記者 許嘉茹 邱紹揚 高雄報導