1男性共4歲囡仔拍甲變植物人 檢方求判12年

檢警佮社會局人員做伙聽醫生解釋囡仔的病情。高雄一位四歲的查埔囡仔，毋但腦重傷、身軀頂也有誠濟搭傷痕，高雄地檢署調查發現，予苦毒是一對兄弟仔，囡仔老母的同居人，姓鄭的查埔人，定拄拍囡仔，兩兄弟食餅仔沙甲規塗跤予處罰，小弟仔不服管教，嫌犯竟然共伊拖去挵壁，囡仔喝艱苦三工閣無隨送病院，這陣囡仔已經成做植物人。11/13檢方偵查結束，對嫌犯求處重刑12年。

聲音來源 高雄地檢署襄閱主任檢察官 林志祐：「照高醫兒保醫療中心醫師，針對被害人傷勢的報告，會當認定被告長期凌治兩个囡仔。本署檢察官建請法院，愛重判求處有期徒刑12年。」

民眾 田小姐：「因為囡仔怹袂曉為家己講話，毋過按呢就是，有可能囡仔就按呢，失去怹猶閣遮少歲的性命。所以我感覺（求處12年）按呢無夠。」

檢方調查，其實兩兄弟仔對2月開始就定拄帶傷去上課，老師感覺奇怪有翕相記錄，毋過煞無即時通報，一直到九月囡仔送病院，代誌才煏空，社會局表示，四歲的弟弟猶佇病院治療，九歲的哥哥送去安置，若是幼兒園真正有延誤通報，怹會追究責任。

高雄市社會局家防中心主任 黃慧琦：「阮會去查證嘛會請幼兒園說明，假使講伊誠實是延遲通報，阮會按照兒少法進行裁罰，罰鍰大概是六千到六萬箍，看伊代誌嚴重的狀況。」

進前因為愷愷的案件，立法院七月重修法，加重凌治囡仔的刑責，只要苦毒囡仔攏是10年起跳的有期徒刑，高雄這件是全國第一件用新法來起訴的，不而過猶是有民眾感覺，囡仔已經變植物人，干焦求處12年傷過輕。

記者 許嘉茹 邱紹揚 高雄報導