為著欲解決桃園龜山區的通勤問題，桃園捷運宣佈取消A8長庚病院，透早7:41分直透的列車，改做每一站攏停。對此有議員認為，按呢的做法無法度真正解決問題，建議愛買新的車廂，增加列車才著。桃園捷運也回應，若欲買車廂需要110億，需要大條的資金。（新聞標題、導言及內文皆為台語文）
上班時間來到機場捷運-A7體育大學站，規个車站攏是人，排隊排甲躼躼長，這是龜山欲去臺北上班的民眾，逐工攏愛面對的問題。
民眾：「因為A7上班的人，蹛入來的人非常濟，然後閣加上班次的距離真正傷大矣，所以講每一幫真正是足kheh的，是真正攏足譀的。」
而且目前桃園龜山區，就干焦A8長庚病院站有直透的車幫，經過A7體育大學站會閬過、無停，這予民眾感覺真無公平。
民眾：「遮坐車的人嘛不止仔濟，所以會感覺講是按怎，A8有（直透車幫）然後A7無的感覺。」
為著欲解決民眾的問題，機場捷運宣佈對10月份開始，取消透早7:41分A8長庚醫院這逝直透的列車，這幫會改做每一站攏停。毋過有議員指出，按呢的做法，無法度真正解決問題。
桃園龜山區議員 陳雅倫：「這只是暫時的做法，根本的做法猶是仝款愛換系統、買車廂、增加班次，才是解決問題的方法。」
桃捷運務處行控中心副主任 熊聖哲：「有關桃捷公司增加買列車的進度，因為車載號誌系統，有部份的設備已經停產，若按呢經過擴充系統的報價，價數真懸愛新臺票110億，按呢阮後續看規个運量的成長狀況，來檢討增加買列車的需求。」
桃園捷運表示，若欲買新的列車，就需要共規套舊的號誌系統換掉，是大筆的金額，而且目前這套舊的系統，評估閣會當用20冬，所以未來會思考配套因應，目前優先考慮，透過取消直透的車幫，抑是增加車逝來改善通勤問題。
記者 鄭亞宣 林郁凱 臺北報導