第一个轉型正義場址 林義雄故居欲tshāi紀念碑

1980年228的時佇臺北發生林家血案，林義雄的老母和雙生查某囝予人刺殺過身，這个所在，這馬是義光教會，經過文化部公告，成做「具轉型正義意涵場址」。這嘛是國家人權博物館四月公告施行「推動民間設置具轉型正義意涵場址」以後，頭一个通過審定的所在。

台灣基督長老教會義光教會牧師 王銘澤：「（未來）場址的佈置，猶閣有遮的資料整合，向望每一改來參加的人，會當了解這个歷史，嘛提醒咱佇這个頂面，自由的重要性。」

義光教會表示雖然逐年攏會舉辦追思林家媽孫紀念禮拜，和紀念政治受難者，毋過怹認為有政府和人權館的協助，才通予民間這寡轉型正義場址通有閣較濟資源保存歷史、推廣人權教育。人權館表示有符合作業要點，包括通做為人民抵抗威權、反省威權統治的所在等等，民間攏通來申請。

國家人權博物館展示教育組組長 黃龍興：「伊（場址）愛做一寡教育推廣工作，阮會希望伊辦一寡小旅行和一寡講座，像高雄的柯旗化故居，閣有臺南的湯德章故居，伊嘛咧問啦，講是毋是嘛會當成做，有轉型正義意涵場址的設置。」

國家人權館表示，場址經過會勘、審議、公告通過以後，未來會設紀念牌，而且逐年上無愛辦一場歷史場址解說、講座，抑是導覽，希望予民眾除了了解歷史，嘛通知影維護人權和轉型正義的重要性。

記者 呂尚儒 莊浚佑 臺北報導