根據BBC的研究，發現ChatGPT、Gemini這寡主流AI，回答新聞問題的時，會編造無影無跡的內容。為著欲予新聞資訊，通受著民眾信任，23間媒體除了共同組成「台灣網路新聞自律聯盟」，欲加強新聞自律。公廣集團和中央社等等的公共媒體，嘛合作開發AI開講機器人，希望協助民眾對抗假新聞和錯誤消息。（新聞標題、導言及內文皆為台語文）
【涉己新聞】臺灣這幾年愈來愈濟人運用AI咧做工課、幫助課業學習等等，毋過根據英國BBC的研究，發現AI回答新聞問題的時，超過5成有重大的問題，有13%會編造無影無跡的內容。為著欲予臺灣的AI通建立佇真實、正確資訊的基礎，臺灣的公共媒體，欲結合大量的新聞資料庫，來做開講機器人「AI Chatbot」，協助民眾對抗假新聞和錯誤消息。
中研院資訊所教授 古倫維：「結合這个公共媒體所有的資料，希望會當予咱的模型變甲愈會靠得，然後逐家會當有一个來源講，若準我欲揣會靠得的資料就咧遮。」
公廣集團董事長 胡元輝：「這个資料庫內底，有足濟咱台語台的資料，所以咱台語台的資料若囥鬥陣的時陣，就會佇咧咱的這个演算，佮咱的推理內底，扮演重要的角色。」
公廣集團董事長表示，這个AI嘛會結合台語、客語、原住民語等等，增加無仝議題見光的機率，上緊明年底進前，會發佈測試版。另外，網路新聞定會為著緊、點閱率，用唌人目的標題，抑是欠缺平衡、查證的內容，致使新聞報導失去社會信任。為著欲改善遮的問題，有23間媒體共同組成「台灣網路新聞自律聯盟」。
台灣網路新聞自律聯盟副召集人 莊勝鴻：「各種引導風向，抑是假的消息其實真濟。網路新聞愈發達，其實國民對新聞就愈無信任感。我認為自律是臺灣新聞最重要的，新的力量。」
聯盟除了制定「網路新聞自律原則」，閣有規畫建立民眾的新聞申訴系統、推動媒體識讀教育等等六大宗旨，嘛邀請民間團體、專家、學者等等，加入諮詢委員會，希望透過聯盟的監督機制，維護新聞的真實性、提升報導品質、嘛強化民眾對新聞的信任。
記者 呂尚儒 莊浚佑 臺北報導