熱人有濟濟夏令營，臺博館嘛和台語團體合作，舉辦「來踅鐵道部」的台語夏令營，予國小的囡仔來參加，佇咧鐵道部園區，透過導覽、激頭腦做任務，予囡仔佇自然的台語情境內底，了解臺灣的鐵道歷史、嘛認捌古蹟。參加活動的囡仔表示，一工落來學著真濟物件，嘛真趣味。（新聞標題、導言及內文皆為台語文）
學員：「我欲予伊遮中央有一个空，然後其他攏是噗起來，按呢㧎佇咧這面頂可能會較好用。」
學員：「就是阮欲試看覓會使行無，結果我一直無成功。」
囡仔激頭腦動手學做火車的車輪，想辦法予伊莫走出鐵枝路。這是臺灣博物館辦的台語夏令營「來踅鐵道部」，營隊老師也共囡仔解說講、火車車輪是圓錐形的，按呢車咧轉彎的時才袂衝出鐵枝路。規畫夏令營的台語團體表示，希望予囡仔通佇台語環境、tshit-thô激頭腦，嘛通了解鐵路智識。
台灣台語路協會合作企劃部長 郭竹屏：「予囡仔熟似火車，熟似火車會當𤆬我去佗位旅行。所以會使熟似的，毋但是火車的種類，嘛有火車發展的歷史。」
營隊嘛結合園區內的火車車廂，防空洞佮八角樓遮的古蹟，予囡仔認捌鐵道歷史佮建築美學。臺博館嘛和台語團體做伙開發教案，這改也佇營隊試教，未來拍算免費提供予有需要的老師、民眾使用。
臺灣博物館長 陳登欽：「阮八、九月的時陣，會閣招老師倚來，閣共遮的教材欲按怎進行，做一个教師的研習營。希望除了阮這个園區以外，入去教室內底會當用，所以我想是全方位的，就是各方位攏會用得來推動（台語）。」
今年台語夏令營攏總8梯、大約240个學員，臺博館表示tann-á開放報名、無到10分鐘名額就搶了了矣，這嘛顯示民眾對台語活動的需求真大，館方表示透過和民間團體合作，結合雙方的專業和優點，希望予台語的路通愈行愈開闊。
記者 呂尚儒 林郁凱 臺北報導