「行政院文化獎」是國家層級上懸的文化領域終身成就獎，針對有重要貢獻的藝文人士，透過這个獎來表揚。今仔日是頒獎典禮，今年著獎名單攏總有三位，包括農民文學作家吳晟、歌仔戲國寶楊麗花，猶閣有客家建築師傅明光，行政院長卓榮泰嘛感謝怹，透過一生的實踐，啟發大眾對土地和文化的了解。（新聞標題、導言及內文皆為台語文）
「全心全意愛你」這首歌，作詞者就是農民文學作家吳晟，伊的文學關懷農民、土地，嘛用筆對社會議題提出批判。對伊來講無土地就無文學，伊種樹仔護生態，嘛關心社會運動。今年吳晟受著行政院文化獎的肯定，佇頒獎這工，伊上掛心的猶是守護臺灣。
文化獎得獎者 吳晟：「愛鄉愛土的精神，一直攏佇需要的時陣，佇關鍵的時刻一定攏會爆發出來，予咱臺灣 做咱臺灣的母親，會當閣來閣較好。」
另外一位行政院文化獎著獎者，就是臺灣歌仔戲的傳奇國寶-楊麗花。
1970-1980年代食飯配電視歌仔戲，是臺灣人的共同記憶，楊麗花予歌仔戲對廟埕、內台，行入臺灣人客廳的電視，嘛影響20世紀歌仔戲的影視美學，伊也投入教育傳承、結合創作，繼續共歌仔戲捒到國際舞台。楊麗花表示，伊上大的向望，就是繼續推出電視歌仔戲。
文化獎得獎者 楊麗花：「足感恩的，我個人最大的希望，歌仔戲會用得閣再電視，閣再來繼續播出。」
閣有一位著獎者，是傳統客家建築師傅傅明光，一甲子以來注心古蹟維修佮文資保存，傅明光表示紲來欲成立傳統匠師公會，栽培少年輩，予傳統建築的工藝技術傳承落去。
文化獎得獎者 傅明光：「只有改善工程環境，才通予傳統建築技術傳承落去，紲來的日子 只要我的身體健康，我猶是會𤆬徒弟仔做伙做工課。」
今年的三位著獎者佇文學、文化佮藝術攏有真重要的貢獻，行政院長卓榮泰嘛感謝ﰀ用一生的實踐，來啟發大眾對土地和文化的了解。
記者 呂尚儒 莊浚佑 臺北報導