高雄三民區人行道畫比車路闊 附近居民抗議
發布時間：
更新時間：
高雄市交通局最近佇三民區一搭巷仔，重新規劃人行道，毋過當地居民煞怨聲連連，因為新畫的人行道做傷闊，出入誠無方便，而且有的機車會直接騎佇人行道，交通局是表示，新的人行道縮小車道，車速會變較慢，對過路人較安全。（此則新聞標題、內文為臺語文。）
三民區大昌一路這條巷仔，塗跤遮一大片青色的攏是新畫的人行道，毋過佇現場看，無幾个人行，顛倒誠濟oo-tóo-bái騎起來頂懸。交通局五月初才拄做好這搭保護型標線人行道，原底用意是欲改善當地交通，予過路人較好行、較安全，毋過當地居民煞無認同。
有當地居民表示：「比論講輪椅專用道抑是行人專用道，拄仔好，有夠用都好矣，相對的阮蹛佇遮的人，阮的車欲出入欲做啥，嘛較方便一寡仔，毋過這陣是成做講一个人佇遮行，路煞遐大條。」
因為附近有病院，停車需求懸，居民認為新的人行道干焦好著外口人，而且人行道甚至是比車道較闊，對此交通局表示，原底無專用的人行道，路口轉斡的車速閣緊，對過路人來講誠危險，所以才會縮小車道畫人行道。嘛有來病院的民眾表示，這馬人行的路佮停車所在攏清清楚楚，是真安全。
高雄市交通局主秘—王志綱講：「為著欲改善行路的環境，通局設計共停車格往內底徙，佇車輛跟用路人之間設一个停車帶緩衝區，同時嘛縮小車道闊度、降低車速。」
有民眾表示：「加較放心矣，對遮內底行，較早愛佇遐佮車輛按呢來來去去相kheh，按呢誠好矣！oo-tóo-bái囥佇中央，人行道囥佇遮按呢人佇行，誠有安全感。」
毋過也有民眾質疑，原底人佇行的紅毛塗地，逐家相爭tshāi車閣囤物件占用，交通大隊表示，遐是倒勼的私人地，無法可管。交通局指出，陸續已經完成117搭標線型人行道，這搭新的人行道地方若是有無仝的聲音，後續有需要in會來做調整。
記者 許嘉茹 邱紹揚 高雄報導
盧元媜/編輯
