國防部新型高級教練機「勇鷹」，也會到高雄岡山空軍基地訓練。毋過最近有居民反映，這款新型的高教機毋但較大台，飛行的聲音也並舊型的AT-3較大聲，煩惱明年閣較濟隻戰機到位，噪音會閣較嚴重。（此則新聞標題、內文為臺語文。）
岡山空軍基地內面，飛行機一台接一台飛上天頂，這是軍方逐工攏愛做的固定訓練，毋過這陣飛的飛行機，毋是較早彼款AT3，是空軍上新的勇鷹高教機，雖然汰換新的教練機，會當提升空軍的戰力，但是這隻勇鷹毋但機型較大隻，飛起來的噪音也比AT3加出欲甲20分貝，袂少居民攏反映，最近真正有較吵。
居民講：「差欲規百倍矣，較早遐較小聲，較早遐是按呢hónn-hónn叫。」、「（聲音）差誠濟有影，但是咱這新買的啊，咱無訓練嘛袂使啊，著毋著啊。該吵就予吵，為著咱臺灣，咱一定愛顧家己啦。」
有民眾認為會當體諒，當地里長是建議，飛行路線會當略略仔徙一下，避開學校，減少對學生囡仔的影響，另外嘛有立委表示，岡山基地攏總欲進33隻勇鷹高教機，這陣干焦12隻爾，民眾就已經反映變較吵，目前軍方對基地附近13个里的補助，一年大約是兩千外萬，無論是設施補助猶是現金，攏傷過久嘛傷過少，希望軍方會當提懸補助。
高雄市梓官區梓信里長蘇上火講：「略仔較飛過台17線彼面，彼面遐較無學生囡仔。」
立法委員邱志偉講：「若三級是三萬箍，一級的話是兩萬兩千五百箍，平均愛等14年，你若無欲領實物補償，也就是防治設施補償，你會當領現金補償，現金補償的金額是每人一年450箍到600箍，也都是講平均一日無到兩箍。」
立委煩惱，明年3月，33隻勇鷹攏交予岡山基地，噪音問題可能會閣較嚴重，針對噪音改善，軍方表示，目前猶閣需要辦公聽會，收集地方意見，才有法度來做後續的處理。
記者