臺南市美術館第二館欲升格成做「臺南國家美術館」，國美館籌備處今仔日正式揭牌，未來美術館以「臺灣近現代美術」做常設展主題。頭一場展覽「福爾摩沙時代—臺灣近現代美術的知識啟蒙」嘛正式開幕，攏總展出158位藝術家、超過200件作品。（此則新聞標題、內文為臺語文。）
文化部佮各界來賓，共紅布搝開，象徵臺南市美術館二館成做「國家級美術館」籌備處。這毋但回應學術界佮濟濟藝術前輩長年來的向望，閣較是一間專責保存展示臺灣藝術史的國家級場館。本成文化部欲設佇臺中，毋過因為地方佮民代反對，臺南市政府主動出聲，免費提供場地。文化部講，這是「臺灣近現代美術館元年」的重要歷史時刻。
文化部長李遠講：「這个年代是上純粹日本人來臺灣了後的創作，到國民政府來了後，嘛帶一批藝術家對中國來到臺灣，臺灣佇長久的歷史有一个上純粹的創作空間，落尾兩爿的藝術家相拄。」
臺南國家美術館未來會以1895年到1960年代的臺灣近現代美術來做展覽主題。籌備處拍頭陣捒頭一个展覽《福爾摩沙時代—臺灣近現代美術的智識啟蒙》，有八大主題，總共158位藝術家、上百件作品，包括陳澄波《南海普陀山》、黃土水《甘露水》等珍貴作品，其中有三份一是頭擺對外公開。
藝術家蒲浩明講：「我對巴黎轉來的時陣初期的作品，我想欲共傳統雕塑和現代雕塑做結合。」
策展人白適銘講：「咱近現代的美術品嘛是有透過文字來認定，有國寶嘛有重要古物，阮希望伊的凝聚會當來帶動新的第二座國家美術館的懸度佮能量。」
文化部講，這項設館計畫是延續2018年所啟動的「重建臺灣藝術史」政策，臺南國家美術館按算會佇兩冬內完成籌備。新成立的南國美，除了會使減輕現有國美館佇典藏佮展覽的負擔，後續in嘛會佮臺南市美術館合作，提升臺灣美術的保存能量佮展示的品質，嘛展現臺南成做「文化首都」的實力。