今仔日是世界母語日，國立科學教育館佇22、23舉辦「語生俱來」世界母語日活動，毋但用台語、客語介紹日常生活的科學原理，也有原住民語的體驗活動，閣設計劇場、親子樂團佮戶外的工作坊。科教館表示，希望透過科學、文化和遊戲，予母語真正結合日常生活，代代相傳。（新聞標題、導言及內文皆為臺語文）
台語導覽員 林懷民：「咱普通時的電火球仔、佮省電的電火球仔、佮LED燈，伊是毋是用電有差，咱共試看覓咧。」
用台語紹介無仝的電火球仔，予民眾了解日常生活用著的電火球仔，伊的原理原來遮趣味，除了用臺語了解科學原理，佇科教館的內底的攤仔位也有台語桌仔耍，來熟似各種動物佮植物。
台語導覽員 林懷民：「頂改咧講彼陣咱講用華語咧講，咱這馬共改做用台語來講，有當時會感覺嘛是足趣味的代誌。」
2月21是世界母語日，國立臺灣科學教育館特別佇22、23舉辦母語科學活動，科教館表示這是頭擺擴大舉行為期兩工的母語日活動，會有臺語、客語的科學展覽，也會當用原住民語的圖卡了解漁業文化和環境議題，希望用這種浸水式的遊戲體驗，幫助囡仔跳脫學校內底學的華語，真正結合生活才通予母語代代相傳。
臺灣科學教育館長 劉火欽：「這種方式沓沓仔予咱的囡仔，佇這種環境中，會使體驗著，伊的阿爸阿母、阿公阿媽講的話；伊會當繼續佇學校、佇厝內，或者是外口公共場合，攏會使來使用，予這个台語、客語、原住民語，會使真正對家庭釘根。」
「這是蜂王，伊的尻川較長、較大隻；這是工仔蜂。」
老師用台語tshuā逐家熟似蜜蜂的分類，科教館表示，今年的活動和傳統靜態的展覽無仝，有遊戲、展覽、親子樂團、劇場，也有戶外的工作坊，希望用多元的形式創造閣較友善的母語環境，予這片土地的各種文化好好仔傳承，抑若台語家庭若是參與科教館的母語日活動，也通累積文化部台語家庭計畫的點數。
記者 張佳倪 謝季潾 臺北報導