建築師漢寶德辭世滿10冬 臺博館辦紀念特展
發布時間：
更新時間：
建築師漢寶德予人講是臺灣現代建築的啟蒙者，親像墾丁青年活動中心、新竹南園、綠島的人權紀念園區，攏是伊設計的。而且有真濟重要的古蹟，比論講鹿港龍山寺、板橋林家花園，攏佇伊的主持之下，對1990年代開始修復。今年拄好是漢寶德別世滿10年，為著紀念伊的貢獻，國立臺灣博物館舉辦特展，向這位有文化深度的建築師致敬。（新聞標題、導言及內文皆為臺語文）
已經辭世的建築師 漢寶德（畫面提供：國立臺灣博物館）：「因為建築是為人服務的，毋是予你，你家己厝內你欲按怎做就按怎做，是毋是？所以你愛對文化、對社會負責任，對思想出發，予這个建築物有深度、予建築師變做思想家。」
建築師漢寶德1934年咧中國出世，後來因為戰亂搬到澎湖，共一生攏奉獻予臺灣的建築設計佮教育發展，佇2014年過身、食到80歲。伊在生的時創辦《建築與計劃》、《境與象》等等的建築雜誌，嘛做大學教授、啟蒙濟濟學生。今已經過身滿10年，為著欲紀念漢寶德的貢獻，國立臺灣博物館為伊辦特展。
國立臺灣博物館長 陳登欽：「漢先生所引起的遮的，不管文資保存、建築教育、抑是建築的觀念，攏影響真濟人。臺博館這改為漢先生辦這个展覽，有揀出真重要的幾件作品（展出）。」
漢寶德毋但是綠島紀念園區人權紀念碑的設計師，恆春有一大片古早厝形式的墾丁青年活動中心，嘛是伊規畫設計的。漢寶德非常注重文史，佇1990年代啟動臺博館、鹿港龍山寺等等古蹟的修復。伊的查某囝表示，雖然老爸過身遮久，毋過伊誠幸運全臺灣攏通看著老爸的形影。
漢寶德的查某囝 漢可凡：「伊有影是盡量活咧看，臺灣所有的每一个所在。這點我感覺我真幸運，我到佗位攏通看著伊的形影。」
臺博館表示，漢寶德是臺灣戰後非常重要的建築家，這改規畫的特展，計共選出1960年代至1990年代，14件代表性的建築作品來展出，毋但有模型，嘛有設計施工圖手稿等等，向望予愈濟人了解漢寶德對臺灣建築文化的貢獻。
記者 呂尚儒 王興中 臺北報導
唐嘉良/編輯
