24點鐘洗車場、鋏尪仔店 噪音影響民眾生活

這陣24點鐘營業的自助店面愈來愈濟，彰化就有民眾反映，袂少24點鐘營業的自助洗車場佮鋏尪仔娃店，開佇徛家附近，半暝機器運轉的聲音、機台的音樂聲，實在予人接載袂牢，嚴重影響著生活品質。

自助洗車場內底，有專業的設備佮空間，袂少民眾會選擇來遮、家己洗車，但是有的自助洗車場、開佇住宅區，附近居民講，常在三更半暝閣有民眾來洗車，予in真困擾

民眾表示，「噪音真大、日時閣會當接受，因為咧做工課、無就是出門，但是暗時欲歇睏，大概八九點了後，阮兜較倚洗車場遐，噪音就會影響阮歇睏。」

民眾：「敢若不三時攏會聽著，頻率算會吱吱叫，無法度睏甲足安眠的按呢。」

這陣24點鐘營業的自助店面愈來愈濟，彰化有議員表示，最近袂少民眾反應，徛家附近有濟濟自助洗車場佮鋏尪仔機的店面，半暝機器運轉的聲音、機台的音樂聲，實在予人接載袂牢，希望會當規範住宅區內、店頭的營業時間

彰化縣議員張錦昆表示，「聲音的管理環保局應當有法度處理啦，但是營業時間應當是，（經綠處)商業科落去針對時間，咱這馬是24小時，若無愛講透早予in做，做甲暗時12點，按呢嘛算時間足長的啦。」

彰化縣政府經濟暨綠能發展處處長張寒青，「（限制時間)這愛去看，佮中央的法規敢有衝突，因為中央的法規是無限制營業時間的，所以目前攏閣咧研究的階段爾。」

縣府表示，目前中央法規無禁止自助洗車場佮鋏尪仔店袂使開佇住宅區，當咧研究制訂相關的管理規範，噪音的部分，環保局會加強主動稽查，必要的時會請業者先針對隔音設備、做改善。