歌仔戲舞台劇 《孟婆客棧》前傳登國家戲劇院

「死愛錢，死愛錢，壓霸狡怪死愛錢！死愛錢，死愛錢，壓霸狡怪死愛錢！」

電視劇孟婆客棧，2022年入圍四項金鐘獎，為著欲傳承臺灣本土的歌仔戲。這擺唐美雲戲劇團，tshuā一陣少年輩的演員，做伙共電視劇延續做舞台劇。

孟婆客棧演員蔡振南講：「唐美雲歌仔戲團員攏一寡少年人，所以毋但愛學演戲跤步手路，閣愛會曉講台語，這是一个真好的展現臺灣文化一个重要的任務。」

頭一改接觸歌仔戲舞台劇的演員方宥心，伊講伊佇9歲就開始參加台語歌曲比賽，而且嘛演過足濟齣台語戲劇。伊認為家己的台語不止仔輾轉，毋過接觸歌仔戲了後，閣予伊感覺台語誠困難。

孟婆客棧演員方宥心表示，「真濟我直接看著字的時陣，我讀攏直接是讀咱平常時講話彼種字、彼種音，毋過結果發現毋是，伊愛用歌仔戲的戲文的聲調去練，所以我其實是直接去拜託劇團內面的台語老師，拜託伊唸予我聽。」

舞台劇的孟婆客棧，內底除了有原本電視劇的演員以外，閣加上一陣少年演員，唐美雲希望會當替歌仔戲注入新的活水。

唐美雲歌仔戲團團長唐美雲講：「當然拄開始袂曉，但是慢慢仔一直接觸、一直學習，in就會愈來愈內行，愈來愈清楚，愈來愈會曉。」

唐美雲希望逐家會當鬥陣來支持本土戲劇歌仔戲，若是袂曉台語的朋友，抑是外國朋友嘛會當來看戲。in會那搬戲，那提供華語字幕。電視演出真成功的孟婆客棧，這改11月份欲佇國家戲劇院演出，無仝的表演舞台，攏是欲展現歌仔戲的媠。