台北霞海城隍文化節 6/1佇大稻埕鬧熱起鼓

歌手以一首南管調的思君歎，來做今年「台北霞海城隍文化節」記者會的開場表演。台北霞海城隍廟是大稻埕真重要的信仰中心，古早話講「三月痟媽祖、五月迎城隍」，代表講這是當地非常重要的慶典，抑若今年的台北霞海城隍文化節，拍算自6月開始。

台北霞海城隍廟文宣組長 吳孟寰，「上重要的6/18，舊曆的5/13迎城隍，這改猶是由咱在地真濟軒社，包括像保安社 靈安社、雙連社、明光樂社等等的，攏會做伙來做暗訪也好閣有日巡，來做迎鬧熱的部份。」

今年台北霞海城隍文化節，也結合臺北建城140年，除了有歌仔戲和北管軒社表演，嘛有結合無仝語言族群的音樂會，做伙來共城隍爺做生日，另外今年有倩知名的大稻埕服裝設計師，結合龍年、海島和永續等等的概念來為城隍爺做新衫。

設計師黃秀瑾，「因為老爺嘛愛佮少年人相接，所以阮就做有帽仔的T-shirt，然後嘛運用就是永續時尚的這个，寶特紗的布料來做數位印花，然後老爺嘛是渡海來臺，所以阮就共這寡海洋的一寡概念，就囥佇阮的規个底圖當中。」

今年台北霞海城隍文化節，自6月初1辦到月底，除了有迎城隍的民俗科儀，也和大稻埕在地店家共同規畫「誕隍祭特展」，欲透過各種活動、展覽和導覽，tshuā逐家來踅大稻埕，了解在地文化。