有一名美國的藝術家佇2001年發起的「紅球計畫」，已經佇世界40外个城市展覽過。這改閬十五年後閣來臺南，3/29頭一站先來去風神廟頭前的接官亭，欲連紲10工佇無仝景點展覽，真濟民眾透早就來排隊翕相做留念。（此則新聞標題、導言、內文皆為臺語文。）
這粒超大粒的紅球，峇拄峇固定佇這个石坊的中央真顯目。這是眾人期待的紅球計劃，伊到今已經去過全世界40外个城市展覽過矣，這回因為臺南400冬，市府邀請藝術家來參逐家做交陪，紅球欲連續10工佇遮，一工徙一个景點做展出。3/29對市定古蹟風神廟頭前的接官亭起鼓，濟濟民眾排隊欲來翕相，嘛有學校趁機會☒囡仔來認捌地方文化。
民眾，「紅球計畫參古蹟的結合，阮就足想欲來看，所以阮家己嘛紮一粒紅球來遮足好耍。」
民眾，「幾年前嘛有去臺北，彼時陣無機會過去，所以這改特別來足難得按呢」
台南散步導覽解說員郭瑞禎，「臺灣府知府蔣元樞，為著欲彰顯這个所在重要，所以特別起這个牌坊，來代表這个所在的重要，遮就是兩百冬前的臺灣的國門。」
紅球計劃是Kurt Perschke對2001年發起，主題是一粒直徑4.5公尺、122公斤重的紅氣球，藝術家常在共球囥佇咧建築物的中央做裝置。每个城市、地點干焦會展出一擺，紲落來會去永樂市場、台南公園佮安平古堡等十大景點。藝術家講，球佇每一个的地點看起來會有無仝的感受，逐家會當那綴著裝置藝術的跤步，那欣賞城市的美麗佮歷史文化。
美國藝術家 Kurt Perschke，「我舊年十二月份，就參Leslie 佇遮做伙做工課，並且嘛揣所有的地點，阮彼當陣佇遮一禮拜，開車四界行行咧，抑是用行的完成的，毋若咧進行研究嘛咧揣新的想法，遮的地點攏必須愛反映著，城市的歷史參和這馬的生活。」
活動對3月29到4月初7，雖罔藝術家有開放予逐家摸紅球、做互動，毋過市府猶是提醒來觀賞的民眾，毋通有傷過激動的行為，就驚紅球予人破壞去。