追思湯德章 臺南第一个「不義遺址」標示揭牌

臺南頭一个由國家人權博物館設的「不義遺址標示」，這陣設踮臺南市中心的湯德章紀念公園，頂頭寫著「若一定愛有罪人，那按呢我一个人就有夠矣」，這是湯德章的遺言。3月13是湯德章律師過身77週年，協會辦追思紀念會，頭擺有日本的市長到場來獻花，嘛有真濟濟民眾特別來感念伊守護臺灣偉大的精神。

民眾表示：「為著誠濟少年朋友，徛出來犧牲家己，這種的精神不管是啥物時代，攏是咱臺灣人上蓋需要的。」

民眾表示：「捌有朋友共我講228是咧騙人的，我心內足憤慨，已經參加這場是第三場矣，希望逐家會當知影228的事件，是真的毋是假的。」

臺南市湯德章紀念協會理事長黃建龍表示：「因為宇土市是湯德章的爸爸，是坂井德藏出世的所在，而且坂井德藏的家族知影這个代誌了後，真積極欲來參與，終算佇今年40人的團體來參加。」

湯德章佇228時，維護臺南的治安，尾手煞予人依叛亂罪共銃殺，這陣猶是真濟人講袂出這段歷史。現場發表「看見湯德章」新冊，嘛有導演宣布「走揣湯德章」電影，這個月15連鞭欲播送的消息，通予眾人看著湯德章的勇氣佮堅持正義的心。

"尋找湯德章"導演黃銘正表示：「每一刻咱攏咧寫歷史，啊咱敢會使記起湯德章，佮老爸的歷史教訓，若講閣有後一擺，臺灣人應該愛按怎決定咱家己的未來，我感覺這是影片，上想欲予逐家知影的。」

為著共人權教育向下釘根，市府串連參湯德章相關的人權歷史場址，攏總設6个「正義佮勇氣之路」的標示牌，提供逐家走讀歷史場景，嘛希望逐家疼惜民主自由的價值。