臺南新化「大目降十八嬈」 三年一科鬧熱起鼓

廟方人員對這隻12公尺長的蜘蛛先進行祭前儀式，才閣用吊車共吊上四層樓懸。新化三年一改的大目降十八嬈活動，到今有上百冬歷史，相傳往過遮有蜘蛛精咧做亂，會予婦女四界拋拋走，致使地方辦夜祭來消災祈福。會先由大目降囡仔宋江陣佈陣八卦形，落尾各廟宇神轎才閣佇外圍箍牢咧，來制煞解厄，祭典唌濟濟民眾來鬥鬧熱。

民眾，「阮頭一改來，感覺看著真趣味，進前無看過民俗活動有蜘蛛按呢。」

在地居民，新化大大細細的廟宇攏有走出來，至少有18間以上啦，對恁在地人來講敢有足重要，這足重要的民俗文化。」

宋江陣指導教練林來源，「利用這个八卦陣八卦佈陣，會當來制煞的功能，通共蜘蛛精制伏。」

根據了解，過去新化四周圍有漢人來開墾，遮攏總有四條大路、四條細條路會當迵來新化，嘛形成一个八卦體，閣加上鎮內有七間廟，予人講遮是好地理。毋過廟方講，當時八卦內煞有蜘蛛咧做怪。這陣IN維持傳統，佇新化中正路參中山路口嘛就是八卦中心，用炮仔來磅蜘蛛消災祈福。

新化朝天宮主委許滄淵，「所以神明欲來顯赫，欲按怎來解決這隻蜘蛛，就是講靠夜祭，阮這个蜘蛛夜祭就是提火把來引火，來燒這隻蜘蛛、予遮的蜘蛛消滅，按呢這冬過矣才會平靜。」

其實這項活動佇日本時代、皇民化運動有禁辦過，後來民國84年地方才開始恢復舉辦。這馬大目降十八嬈除了是臺南重要的文化資產，嘛有安定地方居民真大的力量，in向望通予人閣較濟人來認捌傳統的祭典文化。